揸車嘅，識玩一定搵啲撩lung地方去，愈少人去、愈偏僻愈好。不過有啲地方，成日見人去但自己又搵極都搵唔到條路，連GPS都顯示唔到路線，點解嘅呢？梗係啦，連地名都冇，點search？何況嗰段路Google Map都未必帶到你去，要靠去過嘅人指點迷津。 呢條路線有少少冒險成份，雖然地圖冇但其實已經係公開嘅秘密，好多單車友、傳媒同製作公司都識得去，拍過無數咁多次電視電影雜誌之類場景。不過戴番頭盔先：如果遇到好似之前天鴿咁嘅級數嘅天文大潮，咁就千‧祈‧唔‧好‧去！因為呢條人稱「時光隧道」嘅通道，絕對有機會水浸沒頂，就算只係普通打風都盡量唔好冒險啦，有咩事小則上FB俾全香港人勁鬧，大則勞師動眾要消防救你，咁你就爆紅喇。